ರಕ್ತಾಕ್ಷಿ..

ಕೌರವ-ಕಲರವ ಮುಗಿಲೆತ್ತರಕೆ

ನೆತ್ತರು ಹರಿಸಿದರೂ,

ಪುಂಡರ ಹಿಂಡು-ಹಿಂಡೇ ಕಂಡಾಡಿ,

ಕೆಂಪು ಕೆಸರಲಿ ಚೆಂಡಾಡಿ,

ರುಂಡಾಡಿ, ಮುಂಡಾಡಿ

ಧಮನಿಗಳ ಹರಿದು ಪಿಪಾಸಿಯಾದ

ವಾತ್ಸಲ್ಯಮಯಿಯ ವಾಸ್ತವತೆ..

ಭೀಕರ ಭೋರ್ಗರೆವ ಭೀಭತ್ಸ್ಯಕೆ

ಬೀಜರೂಪಿಣೀ, ಕಾಳಿ, ತ್ರಿಶೂಲಪಾಣಿ

ಏಳುಮಲ್ಲೆ ತೂಕದ ಹಸ್ತಾಗ್ರವಸನೆಯ

ಗಹಗಹಿಸುವಿಕೆ..

ಕಾಲನ ನಿರ್ದೇಶನ,

ಮಹಾಕಾಲನ ನಿರ್ಣಯ...

ನಿಶೆಯಗರ್ಭದಲಿ ಹೂಂಕರಿಸುವ,

ಚೀತ್ಕರಿಸುವ

ದುರ್ಮಾಂಸವ ಹಸಿಹಸಿಯಾಗಿ ದಹದಹಿಸಿ,

ಬೂದಿಯಲಿ ನರ್ತನಗೈದು

ಅರಿವಲಯ ನಿರ್ನಾಮದ ವಿಜೃಂಭಣೆ

ಜಯಘೋಷ, ಹರ್ಷೋದ್ಗಾರ,

ತಾಮಸಗ್ರಸ್ತರ ಗ್ರಹಣ ವಿಮೋಚನೆ..

ಸಾತ್ವಿಕ ದುಂಧುಬಿಯು

ನೂರ್ಮಡಿ ಗಡಚಿಕ್ಕುವ

ಓಂಕಾರದ ನಾದ,

ಜೀವನೆಬ್ಬಿಸಿದ ದೇವ

ವಿಜಯದ ಹೂರಣವ

ಪಾರಣೆ ಮಾಡಿಸಿದ

ಜಯಭೇರಿ ಅಂಬರ ಛೇಧಿಸಿತು

ಜಯ ದುರ್ಗೆ ಜಯ ದುರ್ಗೆ ಜಯ ಜಯ ಜಯ ಜಯ ....

ಸರ್ವರಿಗೂ ವಿಜಯದಶಮಿಯ ಹಾರ್ದಿಕ ಶುಭಾಶಯಗಳು...