ಚಂದಿರ

ಅಂಬರವೇರಿದ ಸುಂದರ ಮೊಗದವ
ಚಂದಿರ ಕುಳಿತಾನೆ..
ಚಿಂತಿತ ಮನಸನು ವಿಕಸಿತಗೊಳಿಸುತ
ಸಂತಸ ತರುತಾನೆ....೧

ಜುಳು ಜುಳು ಹರಿಯುವ ನೀರಲಿ ಬೆಳ್ಳಿಯ
ಬೆಳಕನು ಕೊಡುತಾನೆ
ಕೊಳದಲಿ ಅರಳಿದ ನೈದಿಲೆ ಮೊಗವನು
ಚುಂಬಿಸಿ ನಗುತಾನೆ....೨

ಇರುಳಲಿ ಅರಳುವ ರಾಣಿಯ ಮಿಲನಕೆ
ಭರದಲಿ ಬರುತಾನೆ
ಮಾದಕ ನಿಲುವಿನ ಮೋಹಕ ಚೆಲುವಿಗೆ
ಮನಸನು ಕೊಡುತಾನೆ....೩

ಸಾಗರ ಜೊತೆಯಲಿ ಸರಸವ ಆಡುತ
ಬಾನಿಗೆ ಕರೀತಾನೆ
ಉಕ್ಕುವ ಅಲೆಗಳ ಜೊತೆಯಲಿ ಕೂಡುತ
ನಕ್ಕು ನಲಿಯುತಾನೆ.....೪

ಬೆಳ್ಳಿತಾರೆಯರು ಬಳಸಿ ಬರುತಿರಲು
ಬಂಧಿಯಾಗುತಾನೆ
ಮೋಡದ ಮರೆಯಲಿ ಓಡುತ ಓಡುತ
ವಿದಾಯ ಎನುತಾನೆ...೫


ಚಿತ್ರಕೃಪೆ : photobucket.com