ಉರಗಶಯನ

ಖಗವನೇರಿದ ಉರಗಶಯನನೆ
ಜಗವ ಪೊರೆಯುವ ಅಜನ ಜನಕನೆ |
ಸುಜನ ವಂದಿತ ಗರುಡ ಗಮನನೆ
ಅನಘ ನಿನ್ನಯ ಚರಣಗೊಂದಿಪೆ  ||

ಅರಿಯ ಕುಲದಲಿ ಬಂದ ಪೋರನು
ಹರಿಯ ಮಹಿಮೆಯ ನಿರುತ ಭಜಿಸಲು |
ಸಿರಿಯ ರಮಣನೆ ಕರುಣೆಯಿಂದಲಿ
ಸಿಂಹರೂಪವ ಧರಿಸಿ ಬಂದಿಹೆ || ೧ ||

ಕ್ಷಾತ್ರ ತೇಜವ ಭಂಗಗೊಳಿಸಲು
ಪರಶುಧಾರಣ ರಾಮನೆನಿಸಿದೆ |
ಜನಕ ಕುವರಿಯ ಕರವ ಪಿಡಿಯುತ
ಕಂಜಲೋಚನ ರಾಮನೆನಿಸಿದೆ  || ೨ ||

ಕರಿಯ ಬಾನಲಿ ರುದ್ರ ನರ್ತನ
ವರುಷಧಾರೆಗೆ ಭುವಿಯು ತಲ್ಲಣ |
ಕಂದಮಾಧವ ಧರೆಯಲುದಿಸಲು
ಧರಣಿ ದೇವಿಯು ಮುದದಿ ನಲಿದಳು  || ೩ ||

ಬಾಲ ವಟುವಿನ ಸೋಗು ಧರಿಸುತ
ಬಲಿಯ ಬಳಿಯಲಿ ಭೂಮಿ ಬೇಡಿದೆ |
ಮೂರು ಪಾದದಿ ಜಗವ ವ್ಯಾಪಿಸಿ
ಮೀರಿ ನಿಂತಿಹ ತ್ರಿವಿಕ್ರಮನೆ  || ೪ ||

ಮತ್ಸ್ಯ ಕೂರ್ಮ ವರಾಹ ರೂಪದಿ
ದೈತ್ಯ ಕುಲವನು ಧ್ವಂಸಗೊಳಿಸಿದೆ |
ಶುದ್ಧ ಬುದ್ಧನೆ ಕೃದ್ಧ ಕಲ್ಕಿಯೆ
ಅನಂತಶಯನನೆ ನಿನ್ನ ನಮಿಸುವೆ  || ೫ ||

https://soundcloud.com/shyamalarao/khagavanerida


 ಚಿತ್ರಕೃಪೆ : ಅಂತರ್ಜಾಲ