ಹಾರೈಕೆ.....

ದೀವಿಗೆಯ ಬೆಳಗುತಿಹೆ ದೇವ ಮಂದಿರದಲ್ಲಿ

ಹರಕೆಯನು ಹಾರೈಸಿ ಮನ ಮಂದಿರದಲ್ಲಿ... (ಪ)


ಒಡಲಾಳ ತುಂಬಿಹುದು ಆ ಮಧುರ ವಾತ್ಸಲ್ಯ

ಒಡನಾಡಿ ನಿನ್ನೊಡನೆ ನಾ ಕಳೆದ ಬಾಲ್ಯ

ಕೂಡುತ್ತ ಆಡಿದೆನು ಕೈ ಹಿಡಿದು ಓಡಿದೆವು

ಪ್ರೀತಿಯ ತಿಳಿ ನೀರಿನಲಿ ನಲಿದು ಚೆಲ್ಲಾಡಿದೆವು... (೧)


ಅವ್ವನ ಪ್ರೇಮದ ಧಾರೆ ನಿನ್ನೆಡೆಗೆ ಹೆಚ್ಚಿತ್ತು

ಅಪ್ಪನ ಮಮತೆಯ ಹರವು ನನ್ನೆಡೆಗೆ ಹರಿದಿತ್ತು

ಸೋದರನೆ ನಿನ್ನೊಲವು ಎಲ್ಲವನು ಮೀರಿತ್ತು

ಆದರವ ತೋರಿಸುವ ಮನವ ತುಂಬಿಸುತಲಿತ್ತು...(೨)


ಶಾಲೆಯಾ ದಿನಗಳಲಿ ಕಾಡಿಸುವ ಗುರುವಾದೆ

ಮನೆಯಲ್ಲಿ ಪಾಠಗಳ ನೀ ನನಗೆ ಕಲಿಸಿದ್ದೆ

ಲೆಕ್ಕವನು ಮಾಡುತ್ತ ನಾ ಒಳಗೆ ಕುಳಿತಿರಲು

ಇಕ್ಕೊ ಬಂದೇನೆಂದು ನೀ ಹೊರಗೆ ಓಡಿದ್ದೆ....(೩)

ಹರೆಯದಾ ದಿನಗಳಲಿ ಬಲು ಭಾರ ಬಿದ್ದಿತ್ತು

ಕಳೆದ ಅಪ್ಪನ ಜಾಗ ನಿನ್ನನ್ನೇ ಆರಿಸಿತ್ತು

ಅವ್ವನಾ ಕಣ್ಣಿನಲಿ ನಿನ್ನದೇ ಕನಸಿತ್ತು

ಬದುಕಬಂಡಿಯ ನೊಗವ ನೀನು ಹೊತ್ತಾಗಿತ್ತು...(೪)


ಸಂಸಾರ ನೌಕೆಯಲಿ ನಾವಿಕನು ನೀನಾಗಿ

ಸಂಕಷ್ಟ ದಿನಗಳನು ನಗುನಗುತ ಸಾಗಿಸಿದೆ

ಒಡಹುಟ್ಟಿ ಬಂದೆವು ಒಡನಾಡಿ ಬೆಳೆದೆವು

ನಡೆಯಲ್ಲಿ ನುಡಿಯಲ್ಲಿ ಮಮತೆಯ ಮಾತಾದೆವು...(೫)


ವ್ಯಾಸಂಗದ ದಿನಗಳಲಿ ನಾ ಮಿತಿಯ ಅರಿತಿದ್ದೆ

ವ್ಯಾಕುಲವು ಇರದಂತೆ ನೀ ನನ್ನ ಸಲಹಿದ್ದೆ

ಪದವಿಯನು ಮುಗಿಸುತ್ತ ನಾ ಹೊರಗೆ ಬಂದಿರಲು

ಮುದದಿಂದ ನೀ ನನಗೆ ಸಿಹಿಯನ್ನು ತಿನಿಸಿದ್ದೆ....(೬)


ಅದೊಂದು ದಿನ ನಿನ್ನ ಮೊಗದಿ ಸಂತಸವಿತ್ತು

ಅವ್ವನಾ ಕೋಣೆಯಲಿ ಪಿಸುಮಾತು ನಡೆದಿತ್ತು

ವಿಷಯವನು ಅರಿಯುತಿರೆ ನಾ ಒಲ್ಲೆ ಎನುತಿರಲು

ಹೊಸ ಬದುಕು ಜೀವನದ ಅನಿವಾರ್ಯ ಎಂದಿದ್ದೆ...(೭)


ನಿನ್ನ ಸಂಭ್ರಮ ನೋಡಿ ನಾ ಚಕಿತಗೊಂಡಿದ್ದೆ

ನನ್ನ ಕಳುಹಿಸಲು ಸಂಚು ಮಾಡಿರುವೆಯೆಂದೆ

ಭಾವನೆಯು ಉಮ್ಮಳಿಸಿ ನಿನ್ನತ್ತ ನೋಡಿರಲು

ಹೆತ್ತವರ ಭಾಗ್ಯವಿದು ಎಂದು ಕಣ್ಣೊರೆಸಿದೆ...(೮)


ತವರನ್ನು ತೊರೆದು ನಾ ಬಲು ದೂರ ನಡೆದಿದ್ದೆ

ತುಂಬು ಸಂಸಾರದಲಿ ನಾ ಮುಳುಗಿ ಹೋಗಿದ್ದೆ

ಪಂಚಮಿಯ ದಿನದಂದು ನಿನ್ನ ಬಲು ನೆನೆದಿದ್ದೆ

ನಗುತ ಬಾಳುವ ವರವ ನಿನಗಾಗಿ ಬೇಡಿದ್ದೆ...(೯)


ದೀವಿಗೆಯ ಬೆಳಗುತಿಹೆ ದೇವ ಮಂದಿರದಲ್ಲಿ

ಹರಕೆಯನು ಹಾರೈಸಿ ಮನ ಮಂದಿರದಲ್ಲಿ.... (ಪ)

ಅಣ್ಣ-ತ೦ಗಿಯ ಮಧುರ ಬಾ೦ಧವ್ಯದ ನೆನಪಿನಲ್ಲಿ ಎಲ್ಲರಿಗೂ "ಪ೦ಚಮಿ ಹಬ್ಬದ" ಶುಭಾಶಯಗಳು.