ಸತ್ವೋತ್ಕರ್ಷಣ

ನೀಲಿ ಬಾಂದಣದಿ ಉದಯಿಸಿದ ಹೊಂಗಿರಣ

ಸಡಗರದಿ ಭುವಿಯತ್ತ ಸಾಗಿತ್ತು ಪಯಣ

ಆಸರೆಯ ಅರಸುತ್ತ ನೇಸರದಿ ಪಸರಿಸುತ

ಧರೆಗೆ ಧಾರೆಯಂತೆ ತುಂಬಿಸಿತು, ಬಿಂಬಿಸಿತು ||೧||

ಕತ್ತಲಿನ ಮುಸುಕಿನಲಿ ಬೇಸರದ ನಸುಕಿನಲಿ

ಮುದುಡಿದ್ದ ತಿರೆಯು ತುಸುತುಸುವೇ ಬೆರೆಯುತ್ತ

ಅರುಣನಾ ಸ್ನೇಹವನು ಒಪ್ಪಿತ್ತು, ನಾಚಿತ್ತು

ತನ್ನೆಡೆಗೆ ಸೆಳೆದಿತ್ತು, ಮನದಣಿಯ ಅಪ್ಪಿತ್ತು ||೨||

ಹೊಂಬಣ್ಣ ಹೊತ್ತಿದ್ದ ಹಸನಾದ ವಸುಧೆಯು

ಹಸಿರು ಚಿಗುರೆಲೆಗಳನು ಸಂತಸದಿ ಅರಳಿಸಿತು

ಒಲವಿನಾ ರಾಗವನು ಪರಪುಟ್ಟ ಹಾಡಿತ್ತು

ಪ್ರೇಮ ಭಾವವ ತುಂಬಿ ಮಾಧುರ್ಯ ಹೊಮ್ಮಿಸಿತು ||೩||

ಮಂದಾರ ಕುಸುಮಗಳು ಮಧುಕರನ ಝೇಂಕಾರಕೆ

ವಿಕಸಿಸಿತು, ಪ್ರಖರಿಸಿತು ಮೈ ಬಿರಿದು ನಲಿದಿತ್ತು

ಅರುಣ-ಧರಣಿಯ ಮಿಲನ ಪ್ರೀತಿಯ ಬೆಸುಗೆಯಲಿ

ಜೀವಗಳ ಕರ್ಷಿಸುತ ಸತ್ವದ ಉತ್ಕರ್ಷಣವಾಯಿತು ||೪||